मुंगी

मुंगी - तिला जायचंय इथून तिथे
मुंगी गेली चालत या वाटेवर
या वाटेवरून परतली,
गेली त्या वाटेवर

अशा अनेक वाटांवरून परतत
पुन्हा पुन्हा शोधत
पोहोचली अशा टोकावर जिथून
एकदम दिसेनाशी झाली

कि ती कुणाच्या पायाखाली सापडली
मी संपूर्ण ताडपत्री धुंडाळली
कुठे नाही दिसली
(असेल का तिला मिळाली मुक्ती? )

या विस्तीर्ण पसरलेल्या ताडपत्रीवरून
ती गेली असेल का हिरवळीवर
कि असेल उमटवून सपाट ठसा
कुणाच्या चपलाच्या सोलावर




----- २८-डिसेंबर-२०१५ , मुंबई