कोणी अजगर, कोणी घणस

प्रसंग बाका आहे.
कोणी अजगर, कोणी घणस
कोणी तोंडाला येईल ते पुटपुटत आहे
आजीने कुळस्वामीला हात जोडले आहेत


जो कोणी घणस किंवा अजगर आहे
त्याने देवखोलीच्या मागच्या दारावर ठाण मांडले आहे
त्याचा आवाज आणि हालचाल शून्य आहे
असे पुटपुटण्याचा आवाज आहे

जो  कोणी घणस किंवा अजगर आहे
त्याने अप्पांच्या म्हशीचे वासरू गिळले आहे असे बोलले जात आहे
वासरू गिळले म्हणजे नक्की काय झाले असावे
असा मुलांच्या मनात विचार चालू आहे

आजीने या अगोदर सांगितलेल्या गोष्टींमध्ये
राक्षसाने माणूस आणि सावकाराने जमीन गिळल्याचे नमूद आहे
कोणाचे तरी वासरू गिळंकृत झाल्याची भीती आहे
आणि आपण कोणाचे वासरू नाही ना अशी शंका आहे


आजीने कुळस्वामी समोर हात जोडले आहेत
आजीच्या मते तो समंध/संबंध आहे
अनेकदा तिच्या स्वप्नात आला आहे
आजीला त्याने गिळले नाही या गोष्टीचा धीर आहे

आजी त्याला घाबरत नाही या गोष्टीचा दिलासा आहे
त्याने जावे अशी मनापासून इच्छा आहे

- विवेकानंद सामंत
७-नोव्हेंबर-२०१४, पुणे