वेटिंग रूम

आपण सगळेच एका 'वेटिंग रूम' मध्ये बसलो आहोत
कशाची तरी वाट बघत
वेटिंग रूम मध्ये जागा नसली तरी
माणसं दार उघडून आत येतच आहेत
कधी कुणी वेटिंग रूम सोडूनही जातात
पण गर्दीत आपल्याला त्यांना भेटता सुद्धा येत नाही
अनोळखी बनून ती नजरेआड होतात

'वेटिंग रूम'  मध्ये एकदा आलं की
तिथले कायदे पाळावेच लागतात
सगळ्यात महत्वाचा कायदा
'वेटिंग' चा, वाट बघण्याचा

तो बिनदिक्कत पाळावाच लागतो
जो या कायद्याला विरोध दर्शवतो
त्याला 'वेटिंग रूम' त्रासदायक होते

पण एकदा दार उघडून आत आलं
की बाहेर जाण्याची मुभा नाही
फक्त एकच मुभा आहे
'वेट' करण्याची , वाट बघण्याची

-जानेवारी २०१८