काळी मखमल

काल दार उघडताच
एक काळी मखमल आत आली
जुनी ओळख असल्यासारखी
बेधडक किचनपर्यंत गेली

काळी मखमल भिरभिरती
काल बागडत होती
या भिंतीवरून त्या कोनात
अज्ञात अवकाश शोधत होती

आज मात्र होती निपचित
किचनच्या ओट्यावर
मुंग्यांची रांग अविरत
होती पोखरत

काल  जीच्या असण्याने घर उजळलं
फक्त एका दिवसाची ओळख
हे काळं फुलपाखरू
होतं कुणाला शोधत 

त्याचा सांगाडा माझ्यासमोर होता पडून
मी तो काड्यापेटीत ठेवला ,
वाचवला पोखरणाऱ्या मुंग्यांपासून
पण भिरभिरणारं चैतन्य त्यात आणू कुठून

काळी मखमल त्यानंतर अनेक दिवस मनावर दाटून राहिली 
अनेक दिवस, अनेक महिने
पण शेवटी आणखी अनेक दिवसांनी, अनेक महिन्यांनी
ड्रॉवर उघडून तीच काडेपेटी झाडाच्या कुंडीत उपडी केली



-मुंबई, २६-१०-२०१५